Arannews-Dekabrın 25-də Suraxanı rayon Məhkəməsində hakim Ceyhun Qədimovun sədrliyi ilə AXCP sədrinin müşaviri Məmməd İbrahimin CM-nin 317.2.1 (Cəzaçəkmə müəssisələrində və ya istintaq təcridxanalarında saxlanılan şəxs tərəfindən qadağan olunmuş əşyaların hazırlanması, saxlanılması, gəzdirilməsi, daşınması və ya istifadəsi, 6 aya qədər həbs) maddəsi ilə cinayət işi üzrə məhkəmə prosesi keçirilib. Məhkəmə prosesində M. İbrahimin özü və vəkilləri Cavad Cavadov, Nazim Musayev (dövlət tərəfindən təyin olunan vəkil), dövlət ittihamçısı Elşən Məmmədov iştirak ediblər.Müdafiə vəkilləri M. İbrahim barədə xasiyyətnaməyə imza atması səbəbilə əməliyyat qrupunun rəisi Elxan Şıxəliyevin məhkəməyə dəvət olunması barədə vəsatət qaldırıblar. Buna münasibət bildirən dövlət ittihamçısı vəsatətə etiraz etdiyini bildirib və bunu Şıxəliyevin əməliyyat aparanların siyahısında olmaması ilə əsaslandırıb. Hakim C. Qədimov vəsatətin təmin olunmadığını elan edərək, onun ittiham aktının əsası olmadığını deyib. Daha sonra məntəqə tipli cəzaçəkmə müəssisəsində cəza çəkən hal şahidinin məhkəməyə gətirilməsinin mümkün olmadığı, digər hal şahidinə isə bildiriş göndərilməsinə baxmayaraq məhkəməyə gəlmədiyi qeyd olunub. Hakim növbəti prosesin 8 yanvar tarixində davam edəcəyini elan edib. Xatırladaq ki, AXCP sədrinin həbsdə olan müşaviri Məmməd İbrahim AXCP-dən ayrılmış Mikayıl Quliyevin şikayəti əsasında 2015-ci il sentyabrın 30-da həbs edilib. O, Mikayıl Quliyevi vurmaqda ittiham olunub. Bir müddət sonra vətəndaşlar Oruc Vəliyev və Məhəmməd Qurbanov da şikayət verərək bildiriblər ki, insident zamanı Məmməd İbrahim onları da vurub. 2016-cı il martın 15-də Nərimanov Rayon Məhkəməsi Məmməd İbrahimi Cinayət Məcəlləsinin 221.2.2-ci maddəsi ilə (ictimai qaydanın qorunması üzrə vəzifəni yerinə yetirən və ya ictimai qaydanın pozulmasının qarşısını alan hakimiyyət nümayəndəsinə və ya digər şəxsə müqavimət göstərməklə xuliqanlıq) 3 il azadlıqdan məhrum edib. 13 may 2016-cı il tarixdə Bakı Apellyasiya Məhkəməsi ilkin instansiya məhkəməsinin qərarını qüvvədə saxlayıb. 28 sentyabr 2016-cı il tarixdə Ali Məhkəmə bu qərardan verilən kassasiya şikayətini təmin etməyib. 2018-ci ilin 28 sentyabr tarixində Yasamal rayon məhkəməsi 317.2.1 (Cəzaçəkmə müəssisələrində və ya istintaq təcridxanalarında saxlanılan şəxs tərəfindən qadağan olunmuş əşyaların hazırlanması, saxlanılması, gəzdirilməsi, daşınması və ya istifadəsi, 6 aya qədər həbs) maddəsi ilə təqsirləndirilib, 2 aylıq həbs qəti imkan tədbiri seçib. Penitensiar Xidmətin ictimaiyyətlə əlaqələr şöbəsi buna səbəb kimi cəza axtarış-baxış tədbiri keçirilərkən Məmməd İbrahimin yastığının altından kəsici-deşici alətin tapılmasını bildirir.